1.1
Skilmálar þessir gilda um ADSL- og Ljósnets-þjónustu Símans og taka til hvers og eins rétthafa, eða eftir atvikum notanda þjónustunnar (hér eftir nefndur notandi). Skilmálarnir gilda að því leyti sem ekki er kveðið öðruvísi á í samningum Símans og notenda.
1.2
Með tengingu um ADSL- eða Ljósnets-kerfið er notanda tryggð háhraðatenging við netið, enda liggi fyrir samningur um internetþjónustu við Símann eða annan aðila sem veitir slíka þjónustu.
1.3
Um gjald fyrir ADSL- og Ljósnets-þjónustu fer skv. gjaldskrám sem Síminn gefur út og birtir hér.
1.4
ADSL- og Ljósnets-þjónusta Símans er ætluð einstaklingum og heimilum. Þjónustan er ekki ætluð fyrirtækjum og notkun við rekstur þeirra. Síminn býður upp á sérsniðnar gagnalausnir fyrir rekstur fyrirtækja.
1.5
Virðisaukaskattur er innifalinn í þeim upphæðum sem nefndar eru í skilmálum þessum.
1.6
Skilmálar þessir gilda frá og með 10. júlí 2010
2.1
Síminn kappkostar að uppfylla væntingar viðskiptavina sinna til ADSL- og Ljósnets-þjónustunnar, tryggja stöðugleika hennar og gæði.
2.2
Síminn tryggir ekki að tengihraði notanda sé sá sami og áskrift hans segir til um. Hraði tengingar er ávallt háður gæðum línu þeirrar er liggur til notanda, fjarlægð notanda frá símstöð, álags á línu auk annarra þátta.
2.3
Sé önnur þjónusta en internetþjónusta flutt um ADSL- eða Ljósnets-tengingu viðskiptavinar kann það að hafa neikvæð áhrif á hraða internetþjónustunnar.
2.4
Innanhússlagnir eru á ábyrgð húseigenda. Síminn ábyrgist því einungis tengingu inn í símainntak hvers húss.
2.5
Síminn ber ekki ábyrgð á því þótt samband rofni um stund en mun þó leitast við að koma sambandi á að nýju án ástæðulauss dráttar. Ef notandi nær ekki sambandi í lengri tíma en í 7 virka daga og ástæðu þess er ekki að rekja til athafna af hans hálfu getur hann þó krafist niðurfellingar mánaðargjalds í réttu hlutfalli við þann tíma er sambandið var rofið.
2.6
Síminn ber ekki bótaábyrgð gagnvart notanda að öðru leyti en segir í grein 2.4. Síminn ber enga ábyrgð á nokkru tjóni sem rekja má til sambandsleysis, rofs á þjónustunni eða annarra truflana sem kunna að verða á rekstri ADSL- eða Ljósnetskerfisins, hvort sem slíkt má rekja til línubilana, bilana í sambandastöðvum eða annarra ástæðna.
2.7
Síminn ber ekki ábyrgð á tjóni sem þriðji aðili veldur.
2.8
Fari notkun viðskiptavinar yfir innifalið gagnamagn mánaðar, tvo mánuði í röð, áskilur Síminn sér rétt til þess að færa viðskiptavin í stærri áskriftarleið sem samræmist hans notkun. Sé farið yfir innifalið gagnamagn tvo mánuði í röð verður viðskiptavinur færður sjálfkrafa í stærri áskriftarleið, breytingin mun taka gildi um næstu mánaðarmót. Viðskiptavinur getur óskað eftir því að vera færður aftur í fyrri áskriftarleið, en áskriftarbreytingar í minni áskriftir taka ekki gildi fyrr en um næstu mánaðarmót á eftir.
3.1
Rétthafi þjónustunnar ber fulla ábyrgð á allri notkun henni tengdri og annarri þjónustu sem veitt er í tengslum við hana.
3.2
Óheimilt er að tengja annan notendabúnað við kerfi Símans en búnað sem uppfyllir kröfur 61. og 65. gr. fjarskiptalaga nr. 81/2003 og ber CE-merkingu því til staðfestingar.
3.3
Notandi ber ábyrgð á búnaði sem er í eigu Símans, meðan hann hefur búnaðinn undir höndum. Notanda er skylt að fara vel og gætilega með slíkan búnað er hann hefur til afnota og er bótaskyldur vegna skemmda og viðgerða á búnaði sem ekki stafa af eðlilegu sliti, svo og ef búnaður glatast úr hans vörslu. Ábyrgð viðskiptavinar á búnaði lýkur er hann skilar honum á ný til Símans. Nú skilar notandi endabúnaði til Símans í ónothæfu ástandi eða í þannig ástandi að mati Símans að ekki er unnt að lána hann á ný til annarra notenda sökum illrar meðferðar og skal þá notandi greiða Símanum upphæð sem nemur verði búnaðarins á þeim tíma er hann var afhentur.
3.4
Óheimilt er að endurlána, selja eða veita þriðja aðila aðgang að búnaði í eigu Símans.
3.5
Notanda er óheimilt að taka búnað í eigu Símans í sundur eða stuðla að nokkrum breytingum á vél- eða hugbúnaði sem honum fylgir. Undanskildar eru hugbúnaðaruppfærslur sem sóttar eru til eða sendar af Símanum.
3.6
Að ósk Símans eða við uppsögn áskriftar er notanda skylt að skila inn endabúnaði sem hann hefur til afnota. Ef endabúnaði er ekki skilað verður áfram gjaldfært mánaðarlegt leigugjald samkvæmt gildandi verðskrá, þar til honum er skilað til Símans. Viðskiptavini er heimilt að segja upp samningi áður en hann rennur út, enda geri hann það skriflega með tveggja mánaða fyrirvara og greiði Símanum 8.000 krónur.
3.7
Þeir, sem af ásettu ráði eða vítaverðu gáleysi valda skemmdum á búnaði og fjarskiptanetum í eigu Símans, hafa fyrirgert rétti sínum til ADSL- og Ljósnetsþjónustunnar og kunna að sæta kæru vegna brota á 176. gr. og/eða 257. gr. almennra hegningarlaga nr. 19/1940, nema verknaðinum sé þannig farið, að þyngri refsing liggi við samkvæmt öðrum lögum. Um málsmeðferð fer skv. lögum nr. 19/1991 um meðferð opinberra mála.
4.1
Óheimilt er að nota tengingu við ADSL- eða Ljósnetskerfið til að trufla eða skerða samskipti, tengingar annarra, valda álagi á fjarskiptakerfi Símans, eða að hafa á nokkurn hátt áhrif á notkun annarra viðskiptavina Símans.
4.2
Notanda er óheimilt að veita öðrum en heimilismönnum sínum aðgang að ADSL- og Ljósnetsþjónustunni, t.a.m. með því að samnýta aðgang að þjónustunni.
4.3
Síminn áskilur sér rétt til að tengja Internetaðgang notanda við ADSL- eða Ljósnetsnúmer hans, til auðkenningar og til að koma í veg fyrir misnotkun. Aðganginn að ADSL- og Ljósnetsþjónustunni má eingöngu nota við það símanúmer sem notandi ákveður þegar sótt er um þjónustuna í upphafi.
4.4
Ef í ljós kemur að notandi misnotar búnað eða þjónustu Símans, eða gerir öðrum aðilum það kleift með ásetningi eða gáleysi sínu, hefur Síminn fulla heimild til að synja honum um þjónustu um stundarsakir eða til frambúðar.
5.1
Síminn áskilur sér rétt til að senda notendum póst með tilkynningum er varða þjónustuna.
5.2
Síminn áskilur sér rétt til að tengjast endabúnaði notenda í þeim tilgangi að veita aðstoð og/eða til þess að stilla endabúnað notenda.5.3 Skráður rétthafi tengingar telst ábyrgur fyrir því að reglum þessum og landslögum sé fylgt. Ef skilmálar þessir, reglur eða landslög eru brotin getur það valdið tafarlausri og fyrirvaralausri lokun á þjónustunni.
5.3
Síminn áskilur sér rétt til að breyta skilmálum þessum. Breytingar verða kynntar notendum skriflega með eins mánaðar fyrirvara.
5.4
Síminn áskilur sér rétt til að ákvarða hvort tiltekin samskipti eða athafnir teljast brjóta í bága við þessar reglur.
5.5
Rísi ágreiningur um túlkun og skýringu á skilmálum þessum er heimilt að höfða mál fyrir Héraðsdómi Reykjavíkur.
1.1
Skilmálar þessir gilda um netþjónustu yfir farsímanet (4G/3G/GPRS), hér eftir nefnd „netþjónustan“ sem veitt er af Símanum hf., hér eftir nefnt „Netfrelsi“.
1.2
Skilmálar þessir geta tekið breytingum. Tilkynnt verður um breytingar á skilmálum hér, eða eftir atvikum með sendingu tölvupósts eða SMS skilaboða.
2.1
Viðskiptavinur Netfrelsis Símans er sá aðili sem greiðir fyrir inneignir í Netfrelsi.
2.2
Viðskiptavinur ber ábyrgð á notkun símanúmersins og greiðslum vegna notkunar þess.
3.1
Síminn kappkostar að uppfylla væntingar notenda til Netfrelsis, tryggja stöðugleika þjónustunnar og gæði.
3.2
Síminn tryggir ekki að hraði nettengingar notanda sé ávallt sá sami og áskrift hans segir til um. Hraði tengingar hans er t.a.m. háður fjölda, staðsetningu og afkastagetu senda.
3.3
Síminn ber ekki ábyrgð á því þótt samband rofni um stund en mun þó leitast við að koma sambandi á að nýju án ástæðulauss dráttar.
3.4
Síminn ber ekki ábyrgð á tjóni sem rekja má til sambandsleysis, rofs á þjónustunni eða annarra truflana sem kunna að verða á rekstri Netfrelsis, af hvaða völdum sem er.
3.5
Síminn ber ekki ábyrgð á tjóni sem þriðji aðili veldur.
3.6
Um gjald fyrir aðgang að Netfrelsi fer eftir gjaldskrám Símans sem birtar eru hér.
3.7
Í þjónustuleiðum í Netfrelsi er allt gagnamagn mælt, bæði hvað varðar niðurhal og/eða upphal á innlendum og/eða erlendum gögnum.
4.1
Viðskiptavinur ber fulla ábyrgð á allri notkun sem tengist Netfrelsi og annarri þjónustu sem veitt er í tengslum við það.
4.2
Viðskiptavinur er ábyrgur fyrir greiðslum og allri notkun Netfrelsis sem fer fram með notkun símanúmers hans og/eða með þeim tækjabúnaði sem tengdur er farsímaneti Símans í nafni viðskiptavinar.
4.3
Viðskiptavinur skal gæta þess að lykilorð/aðgangsorð sem eru fengin honum og tengjast þjónustunni, t.a.m. PIN/PUK númer símkortsins og aðgangur að þjónustusíðum á netinu, komist ekki í hendur þriðja aðila.
4.4
Viðskiptavinur ber ábyrgð á greiðslum til Símans vegna notkunar sem á sér stað á Netfrelsi og/eða búnaði, hvort sem viðskiptavinur hefur heimilað slíka notkun eða ekki.
4.5
Ef viðskiptavinur glatar símkorti eða netlykli ber honum að tilkynna það án tafar til Símans. Hægt er að tilkynna um týnt eða glatað símkort hjá þjónustuveri Símans í síma 800-7000 allan sólarhringinn.
5.1
Gjald fyrir Netfrelsi, sem og aðra þjónustu Símans, fer samkvæmt verðskrá sem Síminn gefur út og er hér. Upplýsingar um verðskrá má einnig nálgast hjá þjónustuveri Símans í síma 800-7000.
5.2
Síminn áskilur sér rétt til að breyta þeim fjárhæðum sem tilgreindar eru í verðskrá. Breytingar á verðskrá eru auglýstar á vefsíðu Símans með 30 daga fyrirvara og/eða tilkynnt um slíkar breytingar með tölvupósti til viðskiptavinar.
5.3
Viðskiptavini ber að tryggja greiðslur vegna notkunar á Netfrelsi með debet- eða kreditkorti áður en hann hefur notkun þjónustunnar. Notkun viðskiptavinar er gjaldfærð sjálfkrafa af því debet- eða kreditkorti sem hann framvísar. Komi í ljós að viðskiptavinur er ekki rétthafi þeirra greiðslukorta sem hann hefur framvísað áskilur Síminn sér rétt til að synja viðskiptavini án fyrirvara um veitingu þjónustunnar. Hámarksupphæð áfyllinga á hvert debet- eða kreditkort í Netfrelsi Símans er 30 þúsund á sólarhring og/eða 60 þúsund á viku.
5.4
Einungis er hægt að kaupa netlykil með afborgunum ef greitt er fyrir með kreditkorti. Allir samningar um greiðsludreifingu eru framseldir í innheimtu til Borgunar hf.
5.5
Síminn áskilur sér rétt til að aftengja Netfrelsisnúmer að liðnum 15 mánuðum frá því að síðasta áfylling sem fór fram fyrir þjónustu og/eða símanúmer viðskiptavinar rennur út.
5.6
Gildistími inneigna í Netfrelsi er svohljóðandi:
Gildistími er til miðnættis 31 degi eftir að inneign er keypt. Að þeim tíma liðnum fyrnist hún og rennur út.
Við kaup á áfyllingu, þegar virk inneign er til staðar, er gildistími framlengdur um 31 dag frá síðasta áfyllingardegi.
5.7
Síminn leitast við að birta upplýsingar um sundurliðaða notkun á siminn.is. Síminn ábyrgist þó ekki að notkun verði birt jafnóðum og hún á sér stað. Markmið Símans er að birta notkunarupplýsingar innan tveggja klukkustunda frá því að notkun á sér stað. Þó er áskilinn réttur til þess að birta slíkar upplýsingar síðar ef þörf krefur
6.1
Ef viðskiptavinur stendur ekki við skuldbindingar sínar samkvæmt samningi við Símann er Símanum heimilt að rjúfa nettengingu viðskiptavinar eða takmarka möguleika viðskiptavinar á annan hátt til að notfæra sér þjónustu Símans.
7.1
Síminn áskilur sér rétt til að senda viðskiptavini markpóst og fréttabréf með tölvupósti. Slíkar tilkynningar frá Símanum til viðskiptavinar, auk annarra, verða sendar með tölvupósti á það netfang sem viðskiptavinur hefur tilgreint. Viðskiptavinur getur þó afþakkað þá þjónustu, enda hafi hann samband við Símann vegna þess.
7.2
Að öðru leyti en kveðið er á um í skilmálum þessum gilda almennir fjarskiptaskilmálar Símans hf. um réttindi og skyldur viðskiptavinar og Símans.