Gagnaleki, að gögn frá kerfi eða þjónustu séu tekin ófrjálsri hendi er hluti af nútíma samfélagi. Ótrúlegt magn af gögnum liggja næstum alls staðar þar sem að tölvur koma nærri og því ábyrgð þeirra sem reka kerfi og þjónustu mikil þegar kemur að rekstri og öryggi sinna kerfa og gagna.
Þó hægt sé að gera sitt allra besta til að koma í veg fyrir gagnaleka með t.d. aðgangsstýringum, öruggum og traustum rekstri undirliggjandi kerfa og fleiri þátta er leið hinna óprúttnu aðila oft ekki í gegnum veikleika í kerfum heldur í gegnum okkur mannfólkið, við erum oftast veikasti hlekkurinn þegar kemur að netöryggi. Því mun það áfram gerast sama hversu tækninni fleygir fram að við munum sjá fréttir um gagnaleka.
Ef t.d. netfangið þitt er hluti af gagnaleka þarf það ekkert að vera hræðilegt. En það þýðir þó að netfangið þitt sem þú kannski hefur ekki auglýst víða er komið á lista sem mun fara víðar en þú ætlaðir, og einhver þeirra sem hafa þá lista undir höndum munu reyna að nýta sér það. Þannig er líklegt að þegar að netfang lekur út að fjöldi rusl- og svindl pósta muni aukast þar sem óprúttnir aðilar reyna að komast yfir lykilorð þín, kreditkortaupplýsingar og fleira með því að senda þér tölvupósta sem sumir hverjir líta nokkuð raunverulega út.
Ábyrgð okkar sem einstaklinga þegar kemur að netöryggi er nefnilega talsverð. Við þurfum að nota gagnrýna hugsun þegar við fáum tölvupósta og hugsa hvort þeir séu réttir og vísi á þá staði sem við almennt myndum halda. Sama á við um viðhengi með tölvupóstum sem líta kannski sakleysislega út en geta innihaldið óværur sem geta valdið þér tjóni. Við megum heldur ekki undir neinum kringumstæðum endurnota lykilorð því ef lykilorð er hluti af gagnaleka og við notum það á mörgum stöðum getur leiðin verið greið fyrir óprúttna aðila að nýta sér þær upplýsingar.
Öll eigum við að nota örugg og góð lykilorð fyrir hverja og eina þjónustu sem að við notum og helst ættum við að nota tveggja þátta auðkenningu þar sem það er í boði sem þýðir aukið öryggi fyrir okkur sem notendur. Sniðugt er að fletta upp netfanginu sínu á haveibeenpwned.com sem er gjaldfrjáls þjónusta sem segir til um hvort að netfangið þitt hafi verið hluti af gagnaleka. Einnig er hægt að skrá sig og fá tölvupóst frá þeim ef að upp kemur nýr gagnaleki sem netfangið þitt er hluti af, þannig ertu upplýstari gagnvart því sem snýr að þínu netöryggi og þú getur brugðist við þegar það á við.
