.jpg)
Laugardaginn 28. nóvember birtust Helgi Björnsson og Reiðmenn vindanna í síðasta sinn í bili á skjám landsmanna í Sjónvarpi Símans. Á þessu einkennilega ári, í gegnum bylgjur farsóttar hafa Helgi, Vilborg, Reiðmenn vindanna og fjölbreyttur hópur tónlistarmanna skemmt þjóðinni og reynt að létta okkur lundina í gegnum þennan heimsfaraldur, allt í galopinni dagskrá í Sjónvarpi Símans.
Í þessum síðasta þætti ársins var öllu tjaldað til, hann lengdur og skemmtunin í öndvegi. En þessi viðburður var einnig nýttur til góðra verka og þátturinn því ekki aðeins skemmtiþáttur heldur einnig söfnunarþáttur.
Söfnunin sem rennur óskipt til Mæðrastyrksnefndar gekk vonum framar og söfnuðust alls 20 milljónir króna. Fjármunir sem munu nýtast þeim sem hvað mest þurfa á hjálp náungans að halda og munu komast sér einstaklega vel nú þegar að jólin fara senn í hönd.
Þann 1. desember, á fullveldisdaginn sem einnig er dagur íslenskrar tónlistar fengum við hjá Símanum viðurkenningu sem við erum afskaplega stolt með og full auðmýktar.
Í látlausri athöfn sem haldin var í tengslum við dag íslenskrar tónlistar var velunnurum íslenskrar tónlistar veittar viðurkenningar fyrir stuðning sinn við íslenska tónlist. Síminn fékk þar Gluggann, hvatningarverðlaun sem veitt eru þeim ljósvakamiðli sem stutt hefur hvað best við íslenska tónlist.
Við fögnum íslenskri tónlist sem hefur verið í forgrunni í öllum þáttum Helga frá því í vor, við fögnum íslenskum höfundum og flytjendum sem auðgar líf okkar og menningararfleifð.
Síminn er stoltur að fá slíka viðurkenningu, þau eru viðurkenning fyrir vel unnin störf og að við höfum lagt okkar af mörkum, samfélaginu til heilla. Við erum full þakklætis, ekki bara að fá slíkt klapp á bakið heldur líka gagnvart öllum þeim fjölda sem lagði sitt af mörkum í söfnuninni.
