"
Síminn og sænska fjarskiptafyrirtækið Ericsson hafa undirritað fimm ára samstarfssamning um áframhaldandi uppbyggingu og rekstur á farsímakerfi Símans.
Samhliða enn frekari þéttingu á 4G kerfi Símans um land allt tryggir hinn nýi samningur hraðari uppbyggingu á 5G, nýjustu kynslóðar farsímakerfa en Síminn hefur í dag sett upp 30 virka 5G senda. 5G kerfi Ericsson mun færa viðskiptavinum Símans enn meiri hraða og ánægjulegri upplifun enda Ericsson leiðandi framleiðandi 5G farsímakerfa í heiminum. Samningurinn gerir Símanum einnig kleift að þróa vöruframboð sitt enn frekar og bjóða upp á nýjungar í farsíma og farneti á næstunni.
Samhliða hinum framlengda samningi gera Míla og Ericsson með sér samstarfssamning vegna farsímasenda og bakendakerfa tengd þeim en Síminn mun sem fyrr reka miðju kerfisins ásamt öðrum kerfum sem snúa að virðisaukandi þjónustu.
„Ericsson hefur verið einn mikilvægasti samstarfsaðili Símans frá upphafi. Samstarf milli félaganna hefur verið gjöfult í marga áratugi og við erum stolt að halda því samstarfi áfram. Nýsköpun, netöryggi og vernd persónuupplýsinga hafa aldrei verið mikilvægari þættir en nú á tímum. Með því að velja að vinna áfram með hinu sænska tæknirisa teljum við að öryggi viðskiptavina okkar sé tryggt og hafið yfir allan vafa, ásamt því að Síminn mun áfram geta boðið viðskiptavinum frábæra þjónustu yfir farsímakerfið okkar og að viðskiptavinir okkar upplifi ávallt nýjungar á heimsmælikvarða“ segir Orri Hauksson, forstjóri Símans.
„Við erum full tilhlökkunar að styðja Símann og Mílu enn frekar í að þróa þjónustu sína og þannig gera fyrirtækjum á Íslandi kleift að vaxa og dafna, efla upplifun viðskiptavina sinna og skapa enn fleiri tækifæri fyrir fyrirtæki af öllum stærðum á Íslandi. Ericsson mun innleiða nýjustu gerð 5G tækni sem hefur yfir að ráða enn meiri sveigjanleika og orkusparnað sem mun nýtast traustum innviðum Símans enn betur.“ segir Niclas Backlund, svæðisstjóri Íslands hjá Ericsson.