"
Síminn hefur birt sjálfbærniskýrslu félagsins fyrir árið 2021. Skýrslan byggir á UFS staðli kauphalla Nasdaq á Norðurlöndum en UFS stendur fyrir umhverfi, félagslega þætti og stjórnarhætti.
Sjálfbærniskýrslur hafa víðari skírskotun en birtar fjárhagsupplýsingar en í henni eru greindir mælikvarðar eins og losun gróðurhúsalofttegunda, orkunotkun, starfsumhverfi, launamunur kynja, starfsmannavelta o.fl.
Í eðli sínu er starfsemi Símans ekki sérstaklega mengandi en alltaf má stíga skref í að minnka fótspor Símans og þannig minnka áhrif okkar á umhverfið. Síminn getur líka tryggt að birgjar Símans vinni í sátt við umhverfið og samfélagið í heild sinni og styðji þannig við stefnu Símans.
Nýverið var stefna Símans í sjálfbærni uppfærð, í takt við nýja tíma og málaflokknum gefið aukið vægi ásamt því að þrjú heimsmarkmið Sameinuðu þjóðanna voru sett í forgrunn, markmið sem falla vel að starfsemi Símans og getu okkar til að hafa jákvæð áhrif.
Heimsmarkmið Sameinuðu þjóðanna sem að Síminn valdi eru jafnrétti kynjanna, nýsköpun og uppbygging og sjálfbærar borgir og samfélög. Sem dæmi mun Síminn því beita sér í að auka menntun og þjálfun kvenna í tæknistörfum, auka stafvæðingu, vinna að þróun sjálfbærra og kolefnislágra innviða og styðja við íslenska máltækni.
Framundan eru því verðug verkefni sem munu styðja við markmið Símans í sjálfbærni, starfsfólki, samfélaginu og fjárfestum til hagsbóta.