Starfsfólk Símans styrkir Krabbameinsfélagið

Hjá Símanum er hjarta fyrirtækisins Kaffigarðurinn, kaffihús þar sem starfsfólk hittist með form- og óformlegum hætti og fær sér kaffi og kræsingar hjá Önnu Maríu Jónsdóttur, kaffibarþjóni Kaffigarðsins.
Eins og fyrri ár seldi Anna María Bleiku slaufuna í Kaffigarðinum og hvatti starfsfólk til að styðja við Krabbameinsfélagið ásamt því að minna öll sem komu í Kaffigarðinn að klæðast bleiku á Bleika deginum. Krabbameinsfélagið kom svo og flutti fræðslufyrirlestur um forvarnir.

Starfsfólk Símans svaraði kalli Önnu Maríu og seldust alls 100 Bleikar slaufur, sú síðasta á Bleika deginum sjálfum. Anna María ásamt öðru starfsfólki hvatti svo Símann til að styðja við átakið og Síminn lagði því til sömu upphæð  og starfsfólk hafði keypt slaufur fyrir, 290.000 kr.
„Krabbamein snertir okkur öll, við leggjum okkar af mörkum til minningar um vini okkar og samstarfsfólk sem lotið hefur í lægra haldi í baráttunni við krabbamein í gegnum árin og hugsum fallega til þeirra með því að styðja Krabbameinsfélagið„ segir Anna María.

Ásamt því að klæðast bleiku og styðja Krabbameinsfélagið með kaupum á Bleiku slaufunni var ýmislegt gert til að brjóta upp daginn, bleikt sælgæti var á boðstólnum og mötuneyti Símans setti upp súkkulaðigosbrunn með bleiku súkkulaði til að hjúpa ávexti.

Á myndinni má sjá Árna Reyni Alfreðsson frá Krabbameinsfélaginu og Önnu Maríu Jónsdóttur frá Símanum.