Yfir 51.000 spilanir á fyrsta þátt 112 Reykjavík

Nýja íslenska glæpaþáttaröðin Reykjavík 112, byggð á metsölubókinni DNA eftir Yrsu Sigurðardóttur, hefur hlotið frábærar viðtökur í Sjónvarpi Símans Premium. Frá því fyrsti þátturinn fór í loftið hefur hann verið spilaður 51.386 sinnum, sem undirstrikar mikinn áhuga áhorfenda á þáttaröðinni og íslenskri kvikmyndagerð.

Þáttaröðin segir frá rannsóknarlögreglumanninum Huldari og barnasálfræðingnum Freyju sem vinna saman að því að leysa hrottalegt morðmál þar sem sex ára stúlka verður vitni að morði móður sinnar.

Meðal leikara eru Kolbeinn Arnbjörnsson, Vivian Ólafsdóttir og Þorsteinn Bachmann. Leikstjórn annast Reynir Lyngdal, Tinna Hrafnsdóttir og Óskar Þór Axelsson, en handritshöfundar eru Óttar M. Norðfjörð, Björg Magnúsdóttir og Snorri Þórisson.

„Þetta eru frábærar fréttir og við finnum fyrir miklum meðbyr með Reykjavík 112. Það sýnir okkur enn og aftur hversu langt íslensk kvikmyndagerð er komin,“ segir Birkir Ágústsson, framkvæmdastjóri miðla hjá Símanum.

Síminn er með 12 leiknar þáttaraðir í framleiðslu um þessar mundir, sem lofar spennandi tímum fyrir íslenska sjónvarpsáhorfendur.