2G og 3G loka
28. nóvember 2025
Síminn vinnur nú að lokun 2G og 3G kerfa sinna um land allt. Lokun 2G hófst fyrr í nóvember á sendistöðum á austurhluta landsins, en haldið verður áfram lokunum upp norðanvert landið í byrjun komandi viku. Síðasta áfanga 2G kerfa verður lokað á fyrstu dögum janúarmánaðar og þá hafist handa við lokun 3G. Mikilvægt er að eigendur tækja sem eingöngu styðja 2G og 3G tækni endurnýi þau strax til að missa ekki samband.
Síminn vinnur nú að lokun 2G og 3G kerfa sinna um land allt. Lokun 2G hófst fyrr í nóvember á sendistöðum á austurhluta landsins, en haldið verður áfram lokunum upp norðanvert landið í byrjun komandi viku. Síðasta áfanga 2G kerfa verður lokað á fyrstu dögum janúarmánaðar og þá hafist handa við lokun 3G.
Mikilvægt er að eigendur tækja sem eingöngu styðja 2G og 3G tækni endurnýi þau strax til að missa ekki samband. Enn fremur þurfa eigendur tækja sem styðja nýjustu tækni að tryggja að stillingar þeirra séu uppfærðar og kveikt á svonefndri VoLTE stillingu, ella er hætta á að þau missi sömuleiðis samband.
Upplýsingar um fyrirhugaðar lokanir, tímasetningar, nauðsynleg viðbrögð og leiðbeiningar um VoLTE er að finna hér.
Ný og betri tækni
Lokun 2G og 3G kerfa íslensku fjarskiptafélaganna er hluti af alþjóðlegri þróun. Kerfin eru komin til ára sinna og standast illa kröfur framtíðar um hraða og öryggi, en rýma þarf til á tíðnisviðum fyrir nýrri tækni.
„Síðustu vikur höfum við verið í sambandi við eigendur tækja sem eingöngu styðja eldri tækni í gegnum SMS og símtöl, rætt við viðskiptavini í verslunum og sent erindi til landshlutasamtaka og ýmissa sérsambanda,“ segir Logi Karlsson, framkvæmdastjóri tækniþróunar hjá Símanum.
Hann bendir þó á að alltaf kunni að vera einhverjir sem ekki næst samband við í þessum aðgerðum. Því sé mikilvægt að allir hugi að sínum tækjum og tækjum nákominna, ekki síst þeirra sem elst og yngst eru.
„Líkt og fram hefur komið sótti Síminn um framlengingu á tíðniheimild sinni til að tryggja aðeins lengra andrými í þessar breytingar þegar kemur að 3G,“ segir Logi, en önnur fjarskiptafélög eru sum langt á veg komin með lokun nú þegar.
„Við eigum marga trausta viðskiptavini í eldri aldurshópum sem kunna að vera með eldri tæki og höfum því viljað gera allt til að forðast að þetta komi þeim að óvörum. Hins vegar liggur fyrir að lokanir 2G eru komnar af stað og lokun 3G brestur á eftir áramót, svo það er mikilvægt að bregðast við strax.“
Allar upplýsingar má nálgast hér á vef Símans.