Vertu velkomin/nn til Símans

Góð ráð fyrir umsækjendur

Við leggjum mikla áherslu á að taka vel á móti öllum sem koma í atvinnuviðtal til okkar. Meginmarkmið viðtalsins er að kynnast þér betur og heyra hvað þú hefur fram að færa sem starfskraftur. Í öllum tilfellum er lögð áhersla á trúnað og fagmennsku í viðtölum.

Umsókn og ferilskrá eru fyrstu kynni okkar af þér og því mikilvægt að vanda vel til verka. Oft sækja margir um auglýst störf en góð ferilskrá mun auka möguleika þína á viðtali til muna. Við mælum með að þú fyllir umsóknareyðublöðin vandlega út og látir ferilskrá, prófskírteini og kynningarbréf fylgja með í viðhengi.

Kynningarbréf

Þegar þú sækir um auglýst starf mælum við með að þú sendir kynningarbréf með ferilskránni þinni.
Meginmarkmið með bréfinu er að gefa viðbótarupplýsingar við það sem fram kemur í ferilskránni. Eftir lestur kynningarbréfs á fólk að vera komið með betri mynd af þínum áherslum og hvað þú stendur fyrir sem starfsmaður. Þá skiptir líka máli að tilgreina ástæðu umsóknar og hvers vegna þú hefur áhuga á að starfa hjá fyrirtækinu.
Æskileg lengd á kynningarbréfi er hálf til ein blaðsíða.

Ferilskrá

• Greindu vel frá eftirfarandi þáttum; starfsferli, menntun, námskeiðum, tölvukunnáttu, tungumálaþekkingu og umsagnaraðilum.
• Gættu samræmis í uppsetningu út í gegnum alla ferilskrána.
• Raðaðu upplýsingum í rétta tímaröð, með það nýjasta fremst.
• Skrifaðu skiljanlegan og skýran texta – varastu að vera of fræðileg/ur eða formleg/ur.
• Hafðu ferilskránna viðeigandi fyrir það starf sem þú ert að sækja um – leggðu mesta áherslu á að skýra frá þeirri reynslu sem skiptir máli og minni á það sem skiptir síður máli.
• Við mælum með að hafa mynd í ferilskránni en það gerir hana persónulegri og oft hjálpar það þeim sem les yfir að tengja umsókn við andlit.
• Gættu þess að láta umsagnaraðila vita, æskilegast er að hafa farsímanúmer viðkomandi svo auðvelt sé að ná í hann/hana.
  

Atvinnuviðtal

Lykillinn að því að standa sig vel í atvinnuviðtali er góður undirbúningur. Hafðu í huga að það er mjög eðlilegt að verða stressuð/stressaður og það sýnir að þú tekur viðtalið alvarlega og vilt standa þig vel. Undirbúningur getur dregið úr stressi og hjálpar þér að koma vel fyrir og svara spurningum skilmerkilega.

• Veltu fyrir þér líklegum spurningum og undirbúðu svör. Það er gott að lesa auglýsinguna vel yfir til að átta sig á í hverju starfið felst. Undirbúðu hvernig þú ætlar að greina frá þeirri reynslu og þekkingu sem mun nýtast í þessu starfi.
• Vertu tilbúinn að taka dæmi sem lýsa þér vel. Ef þú telur þig til dæmis búa yfir frumkvæði, veltu þá fyrir þér dæmi úr fyrri störfum þar sem þú hefur tekið frumkvæði. Að vísa í aðstæður eða hegðun virkar oft mun betur en að lýsa sjálfum sér á almennan hátt.
• Kynntu þér fyrirtækið vel til dæmis með því að skoða heimasíðuna eða með því að heyra í vinum og kunningjum sem þekkja til.
• Vertu óhrædd/ur við að spyrja um allt sem þér dettur í hug. Það er okkar hlutverk að kynna fyrirtækið fyrir þér.
• Vertu snyrtileg/ur til fara.
• Vertu þú sjálf/ur, við höfum áhuga á að kynnast þér eins og þú ert.

Gangi þér vel og við hlökkum til að sjá þig!